WordPress.com

’S urrainn dhut blogaichean a chruthachadh air WordPress.com. Thoir an aire, tha WordPress.com agus WordPress.org ann agus tha diofar eatarra. Seo am fear a bheir dhut “dìreach bloga” mur eil thu airson a stàladh air an òstair agad fhèin. Àidh, tha seo caran tro chèile…

• mur eil fhios agad dè tha ann an òstair-lìn ’s mur eil thu ag iarraidh dìreach bloga, gun fheum air stàladh no sgoil-dhubh sam bith, ’s e bloga WordPress.com a tha a dhìth ort. Thoir an aire gu bheil seo saor an-asgaidh ach, leis nach eil dad ann a tha buileach an-asgaidh, gum faic thu beagan sanasachd ’na lùib
• ma tha fhios agad dè tha ann an òstair-lìn agus gu bheil fear dhiubh seo agad agus dè am facal-faire agad ann is tu airson a stàladh thu fhèin ’s air an òstaireachd agad-sa gun luaidh air sanasachd, ’s e WordPress.org a tha a dhìth ort

Chan eil e doirbh clàradh ann – tadhail air an duilleag seo ’s lean ris an stiùireadh.

Android
An dèidh dhuinn coiteachadh fad bliadhna gu leth, chuir WordPress cothrom dhan luchd-chleachdaidh cànan a thaghadh sna roghainnean. Tha e furasta. Turas a bhios WordPress agad, fosgail an aplacaid, thoir gnogag air taba nan Accounts agus Account Settings:

Agus fosgail Language an uairsin:

Agus tagh Scottish Gaelic (gd):

Agus sin agad e. Tha Beurla a’ nochdadh an-siud ’s an-seo fhathast ach cuiridh sinn Gàidhlig air a dh’aithghearr (cha robh cabhag roimhe ’s na cànain bheaga am falach gu tur):

iOS
Tha WordPress ag obair air gleus mar seo airson iOS cuideachd. Cumaibh cluas ri claisneachd!

CÀBHA (Ceistean Àbhaisteach)

1. Tha bloga agam mu thràth!

Ma tha bloga air WordPress.com agad mu thràth, tha e furasta – cha leig thu leas ach tadhal air Users » Personal Settings agus Gàidhlig a thaghadh ann. No ma tha sin ro dhìomhair, tha ceangal ann fo Settings » General “You can also modify the interface language in your profile”. Na dìochuimhnich briogadh air Save Changes an uairsin!

Ma tha fear agad am badeigin eile ’s airson a ghluasad gu WordPress, can o Blogspot, gabhaidh sin a dhèanamh cuideachd. Clàraich airson cunntas ùr air WordPress.com an toiseach agus faighnichidh e dhìot a bheil thu airson fear ion-phortadh gus nach eil.