Teacsa ’na chainnt – Guth Cheitidh

Tha gleus ri làimh a-nis a leughas teacsaichean digiteach os àrd – ann an Gàidhlig. ’S e gleus teacsa ’na chainnt a chanar ris (Text To Speech no TTS gu goirid). Tha seo gu sònraichte feumail do dhaoine a tha dall (slighe leughadairean-sgrìn mar eisimpleir) no ach cuideachd do mhòran eile, can luchd-ionnsachaidh no ma tha leughadh na Gàidhlig doirbh air cuideigin air adhbhar air choireigin. Mus dèid sinn nas fhaide, seo dhut ball-eisimpleir dhith.

Leis gun d’fhuair am pròiseact seo leth-mhaoineachadh poblach (Riaghaltas na h-Alba, Bòrd na Gàidhlig, Comhairle-maoineachaidh na h-Alba agus Ùghdarras Theisteanasan na h-Alba), tha an guth an-asgaidh:

• do bhuidhnean poblach
• do sgoiltean is oilthighean ann an Alba
• clann-sgoile aig an taigh

is feadhainn eile. Gheibhear liosta shlàn air làrach-lìn CALL Scotland (far a bheil foirm tagraidh airson a’ ghutha chuideachd). Ach fiù mur eil thu ag obair ann an àite mar sin no thall thairis, ’s urrainn dhut ceadachas a cheannach air a shon nach cosg an saoghal, £24.99 (le VAT ’na bhroinn; $37.41/€35.34) a-mhàin airson cleachdadh aig an taigh.

Chaidh a dhealbhadh eadar companaidh ann an Dùn Èideann a tha sàr-eòlach air a leithid a ghnothach ann an com-pàirteachas le iGàidhlig agus thèid a shìor-leasachadh leis an dà bhuidheann seo.

An urrainn dhomh fheuchainn mus ceannaich mi i?

’S urrainn. Tadhail air làrach Cereproc, tagh Ceitidh, sgrìobh rudeigin is brùth Play.

Càit am faigh mi e?

Sa chiad dol a-mach, CALL Scotland. Ma tha thu ag obair ann am buidheann poblach no sgoil no a leithid a dh’àite no ma tha clann-sgoile agad, lìon am foirm aig CALL. Gheibh daoine eile air airgead e on bhùth aig CALL (bidh e ri làimh ann a dh’aithghearr, san eadar-àm, cuiribh fòn gu 0131 651 6235 no post-d gu webmaster@callscotland.org.uk).

Ma tha companaidh airson a chleachdadh, feumaidh sibh bruidhinn ri Cereproc.

Leughadairean-sgrìn

Cha robh cothrom againn fiosrachadh mar a dh’obraicheas an guth ann an leughadair-sgrìn ceum air cheum ach ’s e guth stannardach a tha ann agus ma tha leughadair-sgrìn agad mu thràth agus ma stàlaicheas tu guth Cheitidh, bu chòir dhi obrachadh mar bu chòir leis fhèin.

Windows

Turas a fhuair thu an guth fo cheadachas o ChALL Scotland air no o Cereproc, feumaidh tu prògram air choireigin a stàladh a làimhsicheas guthan. Rud mar leughadair-sgrìn ach chan eil feum aig a h-uile duine air a leithid. Dh’fhaoidte nach eil thu ag iarraidh ach prògram a leughas pìosan Gàidhlig on eadar-lìon dhut no post-d a fhuair thu.

Ma tha fear agad mu thràth, bidh fios agad fhèin dè nì thu. Ach mur eil, mholamaid Balabolka, prògram a tha an dà chuid fìor-mhath agus saor an-asgaidh. Gheibh thu an-seo e. Stàlaich am prògram agus an uairsin an guth – ’s faidhle .exe a tha ann agus cha leig thu leas ach a chur gu dol is nì e an corr.

Fosgail Balabolka. Chì thu sgrìn mar seo agus raon mòr bàn – cuir Gàidhlig ann, sgrìobh rud no dèan lethbhreac de rud is cuir ann e is briog air a’ phutan uaine gus a chluich:

Sin agad e.

An aire:

• Chan e dearbhair-litreachaidh a tha seo. Ma chuireas tu ann rudeigin sa bheil mearachdan litreachaidh, canaidh Ceitidh dìreach mar sin e.
• Chan eil e idir fa-near dhuinn a chur ’nur sùilean gur e seo ghleus a thig an àite mac an duine. ’S e a’ Ghàidhlig o bhilean mac an duine an rud as fhearr fhathast. Ach faodaidh an guth seo do chuideachadh ann an grunn shuidheachaidhean. ’S e gleus taice a tha ann.

Mac OSX

Obraichidh an guth air Mac OSX ach cha do dh’fheuch mi e gu ruige seo ach feuchaidh a dh’aithghearr.

Android

B’ fheudar dhuinn guth “Beurla” a thoirt air ach tha Ceitidh ag obair air Android cuideachd.